+886 9電話可能詐騙 7/17起市話有警示語音
發布時間：
更新時間：
對今仔日(7/17)開始，民眾的電話若接著顯示+886 9開頭的電話號碼，會先聽著一段警示聲音，提醒民眾愛注意詐騙。毋過這項服務的，目前只有市內電話，手機仔愛等到10月底，才會提出防詐騙的辦法。(本則新聞標題、導言、內文皆為臺語文)
電話響矣，若民眾接起來的電話、頭起先號碼是+886 9，會先聽著一段警示聲音「這通是國際電話，愛細膩喔，毋通去予人騙去」，才會接通。
NCC對五月開始，針對頭起先號碼是+886 0~8、毋是四常號碼的國際電話，進行阻擋、防詐騙，目前已經阻擋98%。但是頭起先號碼+886 9的國際電話，正常電話是佔7成、可能詐騙的佔3成，所致先用語音警示提醒。
有民眾表示：「伊至少頭起先已經講矣，愛細膩是詐騙，我感覺加減有一寡幫助啦」
嘛有民眾認為：「我感覺無啥效果，會予人騙的就是會予人騙」
但是目前，只有中華電信的市話，才有這段警示聲音，其他的電信業者、佮手機仔的部份，閣需要一寡時間。
NCC基礎設施處副處長 梁伯州：「手機仔這部份愛等到10月底左右，到10月底，5間行動電話的業者嘛會提供這个服務」
NCC表示，現此時也當咧參電信業者研議技術，希望通自動分辨每一通+886 9的國際電話是一般民眾、抑是詐騙，望加強防詐騙效果。
鄭雅存/編輯
