疫情了後頭个歇熱 濟濟臺語營隊通予囡仔參加

燒熱的天氣，大人囡仔做陣歡喜耍水，遮是佇台北市自來水園區舉辦的「臺北親水節」，7月初一、初二兩工，開放民眾免費入場耍水。真濟家長趁歇熱頭一工，就𤆬囡仔來耍。

家長陳先生講：「就想講趁放假的時陣，𤆬𪜶做伙來按呢。」
記者VS囡仔陳小妹：「（你上佮意啥物設施？）彼个黃色的（為啥？）因為伊會噴水。」
記者VS囡仔闕小妹：「（你認為無好耍？為啥物？)因為我驚水。」

學生囡仔開始歇熱，時間有2個月遮長，為著予囡仔袂無聊，有家長安排課程；也有家長講，欲趁歇熱，予囡仔參加歇熱的營隊。

家長蔡小姐講：「會當去外口𨑨迌按呢較好，毋免親像佇學校，規工攏佇教室內底按呢。」

歇熱期間，五花十色的夏令營活動真濟，台灣對北到南，嘛有濟濟台語相關的營隊通參加。親像師大、長老教會、劇團攏有佇台北市、舉辦台語歇熱營隊；新北市也有營隊、𤆬囡仔用台語認捌深坑；新竹嘛有營隊，予囡仔體驗台語戲劇；抑若行到中南部，彰化佮台南也有營隊、予囡仔認捌台語文的媠，抑是行到戶外、若摃木球若講台語。

前幾年，因為疫情，囡仔歇熱攏關踮厝裡，今年疫情解封了後、囡仔的頭一个長假，欲按怎替囡仔安排活動、好好仔利用，真濟家長已經開始咧思考、傷腦筋。