布達佩斯建城150週年 邀請「紙風車」到地表演

紙風車劇團演員、氣勢非凡入場，表演就欲開始，走過臺灣成百个鄉鎮表演的紙風車劇團，這陣是閣一擺到海外演出。

記者 郭柏均：「紙風車劇團以哪吒鬧龍宮的故事，佇匈牙利的布達佩斯MKVM博物館演出，表演精彩。現場濟濟匈牙利佮烏克蘭囡仔，目睭是攏金金看。」

紙風車劇團團長 任建誠：「哪吒鬧龍宮這齣戲因為是佮咱臺灣布袋戲，閣和咱這現代劇場(結合)，閣用咱這傳統的北管音樂配合西方的古典音樂，所以就是足傳統閣足現代的。」

除了希望予國外的人認捌台灣文化以外，因為匈牙利有濟濟烏克蘭難民，紙風車也望透過專門咧顧囡仔的哪吒，予來自烏克蘭的囡仔一寡保庇。這擺紙風車劇團的演出，是因為匈牙利的首都布達佩斯建城150周年，紙風車劇團佮台灣的文化總會、佇台灣駐匈牙利代表處的媒合之下，紲落來幾工，佇在地攏有精彩的演出。

文化總會秘書長 李厚慶：「有規劃六場公開的活動，今仔日是第一場，後禮拜就是重頭戲，佇艾菲爾劇場有兩場正式的表演。紙風車劇團以哪吒鬧龍宮的戲齣，會有兩場賣票演出。」

文化總會表示，對6月16開始，紙風車劇團佇匈牙利會有6場的交流活動佮演出，透過16佇MKVM博物館的臺灣日活動起鼓，展開紲落來幾工的精采演出。