新竹水情絚篤 水利署按重啟緊急海水淡化機組
張君豪 / 新竹報導
發布時間：
更新時間：
水利署針對新竹緊急海水變汫機組重新啟用，最近參在地漁民、里長達成共識，按算4/24進前完成測試，一開始逐工會當生產五千噸的水，才閣沓沓仔提升到一工9千噸。新竹市嘛宣布自今仔日開始，會停止公園佮噴水池這寡公共用水。(本篇新聞標題、內文、導言皆為臺文)
新竹緊急海水淡化場是佇兩冬前，全台洘旱期間臨時設置矣，當時五个外月，總產水一百五十一萬噸，進馬因為又閣拄著欠水，需要重新啟用，經過水利署佮在地漁民溝通了後，決定廿四開始閣再一次進行運作。
漁民：「若是無水通用，無倚靠(海淡場)，逐家攏無水用會誠悽慘，無可能去挖井用地下水。」
北水局副局長 郭耀程：「漁民認為既然佇海水淡化過程當中，可能煩惱相關的權益受著損害，希望政府會當有回饋措施。這部份阮佇現場有相關回應，所以漁民才同意(海淡場)產水。重點是阮嘛有答應原底的產水量，本底的設計上濟是一工萬四噸水，目前產水量是減少到九千噸。」
除了緊急海水淡化廠準備重新啟用以外，新竹地區嘛宣布，調整所有公園以及觀光景點的用水，自今仔日開始毋是必要性的用水攏停止提供。
新竹市城市行銷處長 林正光：「公園一寡噴水造景設施這段時間會關起來，公共便所會換較儉水的水道頭。逐家較煩惱的植物沃水，阮會用水資源回收中心回收的水。」
到4/19為止目前新竹寶山水庫水量賰29%，寶二水庫是38%，新竹科學園區嘛繼續對廠商要求自我儉水5%，逐家攏希望會當冗早脫離洘旱所紮來的無方便。
買湘瑩/編輯
2022杭州亞運 台灣百金之路
