嘉義228基金會辦追思會 展覽紹介不義遺址

徛佇二二八受難者的相片頭前獻花致意。嘉義市的二二八紀念館內底，當咧舉辦不義遺址的展覽，希望用地點的表現，來呈現事件的過程。

嘉義市二二八文教基金會董事長 江榮森表示：「主題就是講會當區分每一个地點，伊佇這个事件當中所發生的代誌，嘛會使將遮四、五個地點，會使當做二二八不義遺址就著」

嘉義地區佇二二八事件當中，有27个所在發生無仝程度的衝突，嘉義二二八紀念文教基金會毋但共地點整理出來，嘛展覽彼當陣的相關文件資料。

臺灣二二八關懷總會理事長 王文宏表示：「當然今這个特展是嘉義市，但是這嘛是反應當時二二八事件，就是三月，這件大屠殺閣來到綏靖清鄉，這攏有關係」

除了展覽以外，嘉義市政府佮二二八紀念文教基金會嘛佇紀念碑頭前，舉辦追思紀念會。基金會表示，希望歷史袂去予放袂記得，嘛莫閣重演。