藍委搤出故宮挵破3件國寶 吳密察:絕無掩崁
鄭雅文 林郁凱／臺北採訪報導
發布時間：
更新時間：
目次
國民黨立委陳以信，早起佇立法院會煏講，故宮拍破古董瓷仔盤，煞掩崁實情。故宮博物院的院長吳密察，中晝有舉行記者會，講有三件瓷仔破去，絕對無掩崁。其中兩件毋是人員的疏忽，另外一件是去予工作人員摔破去。故宮也講：這三件攏無保險，毋過會當修復，但是價值無外界講的25億遐懸。
立委陳以信廿八佇立法院講，伊接著檢舉，講故宮博物院有人員摃破國寶，故宮院長煞愛內部關喙、袂當點交做記錄，伊要求行政院長追查。毋過故宮也隨掰會。
故宮博物院院長吳密察表示：「我佇遮嚴正澄清，絕對無這件代誌，逐家攏知影，相關調查咧進行的時陣，以密件程序處理並無失當。」
吳密察直接掰會講，絕對無隱瞞的代誌，表示自伊就任以來，計共有三件收藏的瓷仔破損，兩件分別是明代弘治款的嬌黃綠彩雙龍小碗，佮清代康熙款的暗龍白裏小黃瓷碗，分別佇舊年2月、今年4月拍開箱仔的時陣發見破損，調查並無人員疏忽，另一件清代乾隆的青花花卉盤才是工作人員摔破的。推測是負責文物數位化典藏的工作人員，檢查的時無細膩造成的。
故宮博物院院長吳密察表示：「假使伊是國寶抑是重要的古物，阮一定照彼種呈報的規定，甚至愛呈報到文化部，但是這三件，是佇暫時分級內底的一般古物。」
吳密察也表示，故宮的文物並無保險，目前兩件破損的瓷仔，一件咧修復、一件咧等待修復、另一件愛等懲罰程序走煞才開始修復，毋過三件攏毋捌展示過，另外因為瓷仔是用幾若件囥一盒，抑是幾若盒囥一箱的方式保管，為著避免閣發生硞著的情形，已經編列明年的預算改善包裝。
專題｜改造地獄路 台灣行人路為何難行？
