音樂劇搬新竹"黑蝙蝠中隊"故事 唱出二戰歷史
張君豪/新竹報導
發布時間：
更新時間：
目次
以新竹在地歷史「黑蝙蝠」中隊，佮在地大煙筒做背景的音樂劇-「北斗星下的大煙筒」。經過3年外的籌備，準備22下晡佇新竹演藝廳演出，欲用歌聲唱出二戰期間感動人的故事。
故事是對一張老相片開始，女主角回想起過去所經歷過的代誌，tshuā觀眾轉去到二次世界大戰期間，因為省籍等等的原因，戀情一開始受著厝內人反對，後來男主角閣派去戰爭，女主角期盼伊平安轉來的心情。
總導演曾慧誠表示:「較早黑蝙蝠中隊背景內底，飛官參台灣查某囡仔的愛情故事，應該是生活故事，透過舊時代的背景予閣較濟人知影，彼當時台灣有誠濟款的人情故事，因為大時代的轉變，有情感的糾結。」
透過文史資料，佮訪問黑蝙蝠（Hik-pián-hok）中隊隊員參家屬，閣再經過專家學者合作才完成劇本，而且閣揣在地合唱團來參與，欲用歌聲唱出新竹的美麗故事。
新竹市文化局代理局長李欣耀表示:「城市的居民若是會使認捌家己在地的歷史文化，一定會對城市有閣較好的認同嘛感到光榮，按怎共文化故事透過轉變，予民眾更加會使接近去了解。」
這是新竹市文化局第一齣原創的音樂劇，透過長期收集文史紀錄佮豐富的資料，欲用表演的方式，重現時代記持。
專題｜改造地獄路 台灣行人路為何難行？
