內科交通變選舉重點 黃珊珊:緊推捷運民汐線

下晡五點一下到，Chris就緊簽退離開公司，發動機車，趕佇窒車進前離開內湖科技園區。這是伊佇遮食頭路五六年的經驗共伊教的。

內科上班族 Chris：「我家己上班就會盡量揀上早的時間，會當較早來共代誌做予了，下班會當較早離開。因為五點半以後，其實下班時間攏真窒，我只要會當避開頭前彼段，交通就會較順。」

窒車的問題，毋但對像Chris按呢的內科員工有影響，內科發展協會理事長廖全平表示，交通問題嘛影響著企業的發展。

內科發展協會理事長 廖全平：「內科是上方便的，科技業閣是少年人上佮意的。但是因為交通問題，可能嘛會影響著伊來內科上班的意願，閣來有當時嘛會影響著咱的生理，來內湖會窒車，麻煩！咱到其他的所在買，遮的攏會影響著無仝層面。」

八月，彼時猶是臺北市副市長的無黨籍臺北市長參選人黃珊珊表示，交通局這幾冬已經增加文湖線的捷運車幫，楦闊港墘路、洲子街、堤頂大道，紲落來民權大橋嘛欲動工，園區內底的瑞光社會住宅會優先予內科上班的人蹛，嘛加開上下班專車，利用資料庫來調整青紅燈的秒數等等。毋過，遮的改善猶是有限。

內科發展協會理事長 廖全平：「我相信，無你今仔日五點來看，四點半、嘛免到五點，一般臺北市的道路袂有四點外就窒的啦！」

下班時間上早窒的所在就是高速公路堤頂交流道，因為內科加上附近工業區的就業人數超過21萬，幾若百臺車佇遮袂振袂動，所以民進黨臺北市長參選人陳時中才提出欲增設引道來疏通車流。

民進黨臺北市長參選人 陳時中（2022.8.7）：「交流道內底，其實伊有幾个窒車的節點，咱欲來共伊減少，予伊會當較緊出入，減少佇平面道路的時間佮青紅燈的等待，遮的窒車就會當得著一部份的解決。」

無黨籍臺北市長參選人 黃珊珊（2022.8.9）：「陳時中先生所提出來的方案，目前講欲增設引道，我佇內湖較久，我懷疑可能伊並無到現場去看過。問題毋是增設引道的問題，是高速公路源頭就窒牢咧，源頭毋解決，設閣較濟引道嘛無效。」

參選人之間的攻防，運輸專家羅孝賢認為，佇臺北這種規模的都市，起路已經無效矣。

淡江大學運輸管理系教授 羅孝賢：「咱這馬佇咧都市內底欲起路，無位予你起矣！你無可能去造路，佇咧都市內底已經無可能矣，非常困難啦！所以咱無啥可能透過起路來解決交通問題，這大概是專業的共識。」

羅孝賢認為，猶是愛提懸民眾坐大眾運輸的意願。三个市長參選人攏真重視捷運東環線佮民生汐止線的進度，另外國民黨參選人蔣萬安表示，會閣提升內湖捷運佮公車的幫次，而且佮新北市合作成立「雙北公共運輸委員會」，做伙解決交通問題。

國民黨臺北市長參選人 蔣萬安（2022.8.12）：「提供新的公共運輸服務模式，包括多元票價，包括咱上網預約座位，就是希望會當整體提升，予咱公共運輸系統效益上大化。」

專家羅孝賢表示，目前參選人提出的攏是提升誘因的「紅菜頭」，另外閣應該愛配合提升駛車成本的「棍仔」，譬如起停車費、收進城費等等。毋過，到底佗一个參選人敢用棍仔，就愛看啥人較有腳數。