教團公佈私大辦學評量 建議考生入學先看明

佇咧淡水的聖約翰科技大學，傳出校內部份學系按算停招，教育部也表示，3月有要求校方董事會愛佇7月底進前傱著6000萬的資金，無會列入專案輔導。初十有教育團體召開記者會，公布以私立大學財務狀況、註冊率、生師比等等資訊做出的圖表，提供學生做入學的參考。

守護臺灣教育平臺秘書長 戴伯芬：「有三分之二的學生是唸私立大學，佇退場條例通過了後，逐家攏有意識著真濟學校當咧快速退場。」

全國私立學校產業工會理事長 尤榮輝：「考生毋通予真濟學校的廣告、話術、助學金所唌迷。若是財務安全抑是註冊率攏是紅燈，考生就愛特別注意，生師比當然反映伊的教學品質。」

學者表示，會使以無仝色水來分辨，簡單看出各校的狀況，若有上䆀的柑仔色、紅色，著愛注意。另外in也呼籲教育部，建立相關制度，予校內人員會使調查學校的財務狀況資料，做陣監督學校。

全國私立學校產業工會理事長 尤榮輝：「教育部應該要求學校對內嘛愛公開財務資訊，對外公開的資訊是無問題，但是對內學生的代表、老師的代表、校務會議的代表、稽核人員，攏看袂著學校的詳細數目。」

教育部表示，有設置網路平台公開校務資訊，予社會各界會使關心各大專校院的運作。但是學者表示，佇平台公開的資訊、是無夠校內人員進行監督，應該愛有閣較詳細的財務資訊等等，才會使達成監督的效果，批評教育部的回應只是應付。