高雄市府佮逼籤詩人員合作 助民眾社福救助
陳嘉筠 賴威佐 / 高雄報導
發布時間：
更新時間：
目次
疫情期間，真濟弱勢家庭生活歹過，這馬高雄市社福中心佮宮廟合作，若準發現來拜拜求籤的民眾需要幫助，就協助轉予社福中心，提供救助金抑是生活物資。
蹛佇附近的阿月阿媽，定定來廟裡拜拜，最近因為生活艱苦，共神明求籤詩，想袂到煞改變伊的生活，毋但是籤詩的內容，伊嘛得著實質的幫助。
龍成宮籤詩班員 林銀表示：「共伊講發覺這問題毋是一工兩工，毋是短期的，需要半年一冬的，拄好社會局社會組織有這个，結合較濟管道來幫助毋是愈好」
阿月阿媽因為後生無佇身軀邊，翁仔某攏著癌，閣愛照顧兩个孫，生活歹過嘛歹勢求幫助，因為宮廟佮社福中心合作，廟裡逼籤詩的人員加問兩句，知影阿媽的困難，馬上共伊鬥相共通報，這馬伊逐個月有三千箍補助佮生活物資，閣有民間的救助。
高雄市社會局副局長葉玉如表示：「會當加問一下厝內發生啥物狀況，如果符合阮脆弱家庭抑是弱勢家庭，就會當轉予阮社工會去關懷、陪伴，提供物資、急難救助」
社會局表示，龍成宮是第一間合作的宮廟，40个逼籤詩的人員攏有上課，目前已經轉予社福中心兩个案例，未來嘛會增加合作的宮廟，冗早發現，協助弱勢家庭。
