炭礦工畫家洪瑞麟110歲愍忌 北美館辦特展紀念

畫出塗炭工的日常，遮的經典畫作是知名的塗炭工畫家洪瑞麟的作品，經過30幾冬後，終於閣佇臺北市立美術館展出。

藝術史學者佮策展人 白雪蘭：「伊的創作就是隨時隨地，然後伊有啥物款的想法，伊就提一本簿仔紙。伊就會使佇坑內抑是佇礦場，伊就對伊描寫的對象進行速寫。」

洪瑞麟會當講是台灣美術史上描繪勞動者生活樣態的代表性畫家。像這幅對少年塗炭工的自信對照老矣對生活的無奈，攏是伊30外冬佇礦場作穡所看、所體會的，今年拄好伊百一歲的愍忌，大囝洪鈞雄特別捐贈家藏作品予北美館，像罕見的塗炭工日誌速寫等等，予外界通看著洪瑞麟佇往過戰後物資欠缺的年代，按怎去畫出伊的感動。

藝術史學者佮策展人 白雪蘭：「其實伊就感受著講，人生原來其實就是一種拚命。所以伊到礦場作穡了後，伊看著遮的塗炭工為著生存，伊就必須愛冒生命的危險，然後到坑內作穡，所以伊就會繼續來畫IN。」

這改展覽《掘光而行》對洪瑞麟早期到尾期的作品、文獻等等大約350外件，全面性來展出，也象徵伊過去對追求塗跤底的光到食老追求紅霞餘光的追光精神。