以白色恐怖做新歌 "拍謝少年"閣招受難者拍MV

「拍謝少年」樂團發表上新的MV出巡，地點是佇景美人權園區，因為歌曲故事就是白色恐怖事件，捌牽涉52年前「泰源事件」的白色恐怖受難者蔡寬裕，嘛佇MV出現，伊tshuā領電氣神將佮車隊，親像廟會繞境，閃閃爍爍的燈火，真鬧熱。

拚場藝術撞擊藝術總監 李文政表示：「阮想欲共彼个空間改變，希望逐家去彼个所在，去看內底所在，是足鬧熱的活動，足華麗、足媠的，因為歷史佮問題你換一个角度看」

這支MV上特別的就是邀請九十歲的政治受難者蔡寬裕參與，伊講家已接受過百外斗的訪問，是頭擺翕MV。

李文政表示：「有一个真正的人佇內底，故事重量無仝款，彼是真的，毋是假的。較重要的是，向蔡寬裕致敬，向前輩致敬」

佮拍謝少年合作的拚場團隊，毋但有MV，目前佇台灣燈會展出的勻境，嘛有仝款的繞境車隊，攏是李文政的創作，伊講共歷史佮受難者故事，成做藝術創作抑是影像、歌曲，講予後一代聽，這就是傳承。