嘉義縣的老年人口比例全國上懸，而且18个鄉鎮有超過700間廟，有宗教活動的時陣，誠濟序大抑是行動無方便的人攏需要無障礙設施。縣政府這兩年配合宗教團體補助無障礙設施，按算今年底以前，攏總有300間宮廟會當完成無障礙設施。
坐輪椅已經25冬的陳先生講，以前一个人上廟寺，上加干焦有法度到廟埕，這馬總算是會當閣入去廟內底拜拜。
陳先生表示：「我受傷按呢25冬矣，拄好頭擺家己行入去廟內底共神明拜拜，感覺足好的」
嘉義縣政府補助廟宇設置無障礙設施，舊年已經有160間完成，按算今年會當到300間。希望行動無方便的民眾佮序大，欲去廟內底拜拜會當閣較方便。
嘉義縣長 翁章梁表示：「我感覺講食老了後艱苦病疼，講實在，有時仔神明是一个足大的安慰，包括拜拜會感覺心肝較平靜。所以我感覺講，嘉義的老序大遮爾仔濟，嘛有足濟人攏坐輪椅，行動無方便」
民雄保安宮主委 何文卿指出：「過年攏遮的老人愛用著，所以就按呢堅持來做」
嘉義縣18鄉鎮，大小間廟寺超過700間，嘉義縣政府先針對人較濟的廟來捒無障礙設施，一寡空間較狹，或者是古蹟的廟宇，嘛會用活動式的無障礙設備，希望行動無方便的序大佮民眾，宗教信仰的基本權益嘛會當受著保障。