核四公投意見發表 正方黃士修對戰反方邱威傑

上尾一擺的公投意見發表會11下早仔舉行，其中重啟核四公投這案，正方代表是公投提案人黃士修，反方是台北市議員邱威傑。發表會一開始，黃士修就反駁反核方對斷層、設計安全、重啟規劃等等的質疑，講遮的質疑攏是無證據。

重啟核四提案人黃士修表示請反核方看環評法施行細則第37條，其實會使專案免環評，上加提環境差異分析就好矣，摃仔寮封存這七年以來，無發生嚴重的災害，若是2號機的建照無法度通過，一定是審查委員予反核團體收買。

黃士修強調，核四有安全無、敢有弊案，只要公投通過就會使來共同檢視。邱威傑反駁，若欲調查核四、這馬就會使做，無需要等公投結果。 伊嘛針對重啟核四需要的環境評估問題，進行說明。

臺北市議員邱威傑指出，當年的環評是佇1991年做的，台灣的環評法攏猶未通過，所以核四的環評並無經過台灣的環保署的審核，顛倒透過毋是環境專業的原能會來試辦環評，當時毋但無公民參與，過程嘛攏放目。

邱威傑表示，當時的環保署佮監察院攏有提出質疑佮糾正，這馬佇相關安全措施完成確認進前，重啟核四嘛無法度專案處理。黃士修回應，核四的環評是佇1991年做的，核四的建照並無因為落尾環評法通過失效。