用樂高疊角仔拍片講臺語 望囡仔那𨑨迌那學習
鄭雅文 林郁凱 / 臺北報導
發布時間：
更新時間：
世界出名的𨑨迌物製造商，樂高的疊角仔，真濟大人、囡仔攏愛耍，網路也有相關的電影、短片等等。這馬有親子空間業者，特別用臺語文製作樂高影片，希望用趣味的形式教囡仔講臺語。
「李醫師𠢕早。𠢕早。阿玫，較等咧來共我鬥縛一下。」
世界出名的樂高，捌出品蓋濟受歡迎的動畫影片。這陣也有人用這來出台語版本矣！像這集是診所篇。
親子遊戲空間總監，Corrine Chen：「阿寶，阿寶𪜶阿母，然後這位是資深護理師。」
親子遊戲空間店長，Jolin Kuo：「李醫師𠢕早。」
設定劇本、角色，共人物的行位、欲講的台詞重複錄製，團隊本來就經營親子空間，發現囡仔愛耍的樂高，也通做台語教材。
親子遊戲空間總監，Corrine Chen表示：「對劇本、配音，規个製作，固定攏是用樂高的方式來做看覓，對這个臺文會當，予𪜶佇生活中較捷來講臺語按呢。」
親子遊戲空間店長，Jolin Kuo表示：「其實講真的，用遮的細節、趣味的畫面，不管你欲做啥物語言，其實攏有機會的。」
團隊內底有人學台文，所以字幕也有台文版本，也因為一開始設定的題目是欲予囡仔認捌各種的職業，所以就號做百工日誌，預計先翕六集，每集10分鐘以內。另外進前因為疫情暫停的台文等等相關課程，也陸續恢復，希望推展台文這塊，無論用影片抑是課程，攏通繼續經營。
