高雄新草衙違建猶3百戶無買地 議員促市府協助

前鎮新草衙地區，閣有袂少平階佮狹巷仔，早年真濟拆船佮碼頭工人蹛遮，有四千戶違建，市府進前予住戶五年的時間會當買地，目前猶是有三百外戶無買，當地里長講，大部份猶是經濟因素。

高雄市前鎮區興仁里長張秋敏指出：「違建戶有十一里，足濟閣想欲買的人，因為彼當時舊年六月十二到期，有的是彼當時無錢通買」

這間已經有六十年歷史的慈正宮，干焦這塊地就愛兩千萬，廟方講彼當時準備欲貸款煞已經過期，所以袂赴買，這馬信徒攏想欲鬥相共募款。

高雄市前鎮區興化里長朱蘇來蔭講：「這馬用新方案賣，專案已經過矣，新案無法度買，阮希望市府閣延一年，予阮這間廟完成」

規个新草衙地區，市府列管3104戶，最後2801戶買地，猶有303戶無買，議員煩惱會造成以後都更佮整併的困難。

高雄市議員黃文益表示：「伊只要是無愛搬，鎮佇遐，無法度進入整併」

高雄市都市發展局長楊欽富是講：「這个地區有整併好的土地，袂赴頂面的自治條例，鼓勵in用危老方式來調整，容積率基本是百分之三十，上濟百分之四十，比原來的百分之二十閣較好」

都發局表示，自治條例欲重新啟動有困難，當地里長佮議員是希望會當延期，若無市府嘛愛有因應作法。