臺灣對1992年有就業服務法，開放移工入來到今30外冬，今年咱已經倩超過70萬位移工，成做臺灣重要的勞動人口，不過𪜶的勞動條件佮薪水福利，猶有誠濟欠缺，國家人權博物館頭擺以移動人權做主題，邀請民間團體鬥陣辦展覽，希望予閣較濟人了解臺灣的移工史。
對加工業、製造業、紡織業，到厝內的看護工，外口做工的工仔人，四界攏看會著移工的形影，為著予閣較濟人了解國內70外萬移工，𪜶的生活和勞動狀況，人權館頭擺以移動人權為主題，邀請15个民間團體鬥陣辦特別展。
策展人，林正尉表示：「咱這馬按怎看，咱這馬2021年，閣搪著疫情，咱是按怎去回顧講，其實遮的移工，對台灣社會佮經濟攏足有貢獻，這个貢獻，是按怎台灣人你共人看袂起。」
台灣對1992年有就業服務法，開放移工入來食頭路，今年國內已經倩超過七十萬位移工，不過民間團體認為移工的勞動條件猶有濟濟欠缺，無適用勞基法的，包括家庭看護工和漁工，家庭看護工上低基本工資萬七，漁工無上低工資的規範。綴疫情轉和，國際搶工的情形也愈來愈明顯。𪜶望政府趕緊檢討移工勞動條件，保障勞動產業的穩定性。
台灣人權促進會秘書長，施逸翔表示：「阮一直提頭，所有外籍移工攏愛適用勞基法，消除歧視，其實外籍移工的貢獻，佮台灣人的生活是縛做伙的，其實咱應該會當予遮的外籍移工，予𪜶有尊嚴的勞動條件。」
這改的展覽叫Ayo-Ayo 明仔載會閣較好，AYO佇印尼語表示相招和鬥陣，也有愛加照顧家己，祝福對方一路順風的意思，人權館期待這改展覽，對國內三十年來的移工歷史，予人閣較了解移工真實的生活和工作處境，予明仔載閣較好。