高雄輕鐵絞著人工草埔敗馬 車頂2人無受傷

高雄輕鐵今仔早起發生人工草坪絞去入去車底,煞造成列車敗馬的意外,佳哉車頂的2位乘客攏平安無受傷。經過搶修了後,下晡3點已經恢復通車。

電眼畫面看著,高雄輕鐵的車廂駛佇凱旋路段,猶未到車站煞沓沓仔停落來,早起八點四十,附近徛家民眾有聽著聲,連鞭出來看覓發生啥物代誌。

民眾表示:「蓋大聲,兩个鐵仔相鑢的聲,我有聽著聲,然後就看in慢慢仔停落來」

原來這節輕鐵車頭,已經脫離軌道,佳哉車頂兩位民眾攏無著傷,安排去後一站坐車。高雄捷運人員檢查車底,挖出真濟草庀仔,才發見是規大片的草埔攏絞入起車頭底。

高雄捷運公共事務處長王柏雁指出:「伊的高程袂當懸過鐵枝路面,大概兩公分、五公分是盡磅,目前大部份路段其實攏符合標準。是毋是佇早起舖設過程中,有局部高程佮阮車下設備產生干涉」

高雄捷運表示,工人是早起八點開始舖草埔,其他班次經過攏無問題,為啥物這幫車無拄好會絞著草埔,高捷這馬愛想辦法予車頭閣徙轉去鐵枝路,共車拖轉去檢修,嘛造成輕鐵部份路段單線通車。頂個月底,輕鐵嘛捌發現一塊草埔掀起來,駕駛緊急停車的事件,這擺事故原因,閣愛等運安會調查。

全台敬老金大調查

相關新聞