美麗華罷工結束 勞資每兩禮拜開會完成團體協約

放煙火，閣辦暗會慶祝，今年年初，美麗華開發公司因為公司分割，解雇部份山球場員工，所致工會發起罷工。23這日勞資雙方總算達成協議，包括雙方會撤回部份的訴訟，工會嘛宣布停止105工的罷工行動。

美麗華工會的秘書蘇承志表示，「阮的協議包括參與罷工煞予解雇的員工復職，遐4月初8公司企業分割時無予留任的，包含當時的理事長黃文正佮幾个會員，阮攏有轉去要求賠償。」

26早時5點、天猶未光，工會成員做陣行入山球場、準備上班。雖然勞資雙方的團體協約猶未簽訂，但是這馬已經達成共識，會每兩个禮拜，到新北市產業總工會開會，沓沓仔討論團體協約。工會講，目前對團體協約的方向有兩个。

蘇承志也講，「佇美麗華山球場食頭路的相關場務人員，正職的人數應該愛有一定的人數保障，嘛包括講公司若是有勞動條件變動進前，應該愛先通知工會，嘛愛提早通知員工。」

山球場的草坪真久無整理，已經生香菇矣。美麗華開發公司表示，山球場目前當咧沓沓仔恢復，會以拜六向會員開放部份球場做目標，規个整理作業，可能愛開一個月才有法度完成。