今日開放預約注高端網站大窒 聯亞無通過EUA

今仔日早時仔10點,開放民眾去登記疫苗,這回有通仔登記高端疫苗,一開放、網站就窒車,半點鐘過後才沓沓仔恢復。另外指揮中心宣布,聯亞疫苗的中和抗體數據、無合格,21位專家、審查投票,有17票無同意,無通過EUA審查。

民眾:「你好,拜託一下,幫我預約高端。」。

8/16開始,民眾會使來預約高端疫苗,早時10點一開放,1922網站隨窒車,到10點半左右才沓沓仔恢復正常。除了家己上網路預約,嘛會使到藥局請藥師鬥相共,10點一到,就有民眾上門辦理。

民眾:「因為別的品牌我是感覺講,國產的佮其他的攏仝款意思。」。
民眾:「因為伊是以早就有的製作過程嘛,所以我感覺較安全一寡仔。」。

衛福部長陳時中表示,到今仔(8/16)日為止,阮確定封緘檢驗,是61萬4204劑,是照阮規劃的人數,若是封緘檢驗閣有合格的,嘛無排除佇這波注的時陣閣加入來。

高端疫苗8/15表示,已經向巴拉圭申請高端新冠肺炎疫苗的EUA,佇巴拉圭的第三期臨床試驗嘛當咧繼續進行。另一方面指揮中心表示,聯亞新冠肺炎疫苗的的EUA審查,結果是無通過。

食藥署長吳秀梅:「計共有22位專家出席,主席無參與投票,21人投票結果是有4人補件再議,有17人是無同意通過,」。

衛福部長陳時中:「疫苗安全性會當接受,有細胞免疫反應趨勢,另外中和抗體數據顯示,無法度達到所定的,疫苗免疫橋接不劣性標準。」。

聯亞欲佇印度進行第三期的臨床試驗,指揮中心表示,聯亞會當家己評估,看是毋是欲提第三期臨床試驗的結果,閣來食藥署申請審查。



 

全台敬老金大調查

相關新聞