萬華茶館上緊9月復業 12間違建限8/20前拆除

臺北市政府表示，欲輔導艋舺地區的茶館重新營業；這禮拜就開始通知有違章建築的茶館，愛佇期限內改善拆掉。另外，當地居民也講，有真濟外籍移工佇茶館食頭路，市政府講若是發現違法移工，也會依法處理。

違建公告貼佇艋舺三水街這間茶館門口，台北市政府規劃欲予艋舺茶館重新營業，但是建築愛符合法規，這禮拜開始通知業者，要求佇16至20家己拆除，無就會強制拆除。根據市政府統計，違規的12間茶館，有5案是占用火路、5案有營業用的灶跤、2案厝頂違建、2案空地違建，總共14案違規。

台北市建管處主任秘書洪德豪表示：「若是業者對違建的認定有問題，抑是有其他原因無法度執行、無法度佇期限家己拆除，會使佮建管處申請，送爭議委員會處理，會使看個案的情形來放冗改善的期限。」

艋舺居民講，有袂少外籍移工佇茶館食頭路，台北市副市長蔡炳坤強調，這馬輔導艋舺茶館重新營業，若是有違法移工佇茶館做工課，會罰雇主15萬到75萬

臺北市副市長蔡炳坤表示：「無證的移工當然是袂使佇茶館業食頭路，這違反就業服務法。」

台灣國際勞工協會專員許淳淮則表示：「講違法移工的時陣，我感覺應該愛先看著一件代誌，為啥物遮的移工欲做違法移工？其實有真濟是因為咱這馬政策上的無合理，歧視的對待，才會強迫in需要離開原本的工課場。」

許淳淮舉例，台灣這馬無開放移工自由轉換雇主，若是in佇現此時的工作環境拄著問題，閣無法度自由轉換，就可能會選擇違法去揣別項工課。伊認為，政府應該做的毋是直直掠遮的移工，是應該愛來修改制度。