傳藝金曲獎入圍公佈 廖乾元.廖瓊枝著特別獎
洪敏真 林郁凱 / 台北報導
發布時間：
更新時間：
目次
這回第32屆傳藝金曲獎，有真濟優秀的劇團佮作品攏有入圍。而且這回的特別獎，是頒發予已經過身的四海唱片創辦人-廖乾元，佮歌仔戲的人間國寶-廖瓊枝。
以「昭君出塞」做分界，對舞台、音樂、服裝到表演攏有巧思，展現胡漢無仝的民族風情。女主角王昭君由薪傳歌仔戲劇團當柱小旦張孟逸演出，這齣薪傳年度大戲《昭君丹青怨》，入圍第32屆傳藝金曲獎，包括最佳團體演出獎、 最佳編劇獎、最佳導演獎等等6大獎項。
薪傳歌仔戲劇團的當家小旦──張孟逸表示：「薪傳歌仔戲劇團已經第32个年矣，首團其實欲共這齣戲做起來其實真無簡單。廖瓊枝老師嘛足拍拚矣，一直共阮募款，予阮這齣戲會當演起來」。
除了《昭君丹青怨》，仝款是戲曲表演類六大獎項全攏入圍的作品，猶閣有唐美雲歌仔戲團的《光華之君》和春美歌劇團佮金枝演社共同製作演出的《雨中戲臺》。
《雨中戲臺》的導演王榮裕指出：「規个過程這兩團本來一个傳統班、一个是現代班；一个南、一个北，結果阮咧排戲佮演出的期間，兩團的鬥陣攏足融洽矣」
國立傳統藝術中心主任陳悅宜也講：「其實就證明咱台灣本土發展出來的傳統戲劇，佇現代是受著肯定的」。
這屆傳藝金曲獎戲曲表演類特別獎，發予人間國寶廖瓊枝老師，出版類特別獎頒予四海唱片已經過身的創辦人廖乾元先生，十月初九會正式頒獎。
2022杭州亞運 台灣百金之路
