大雨致屏東大鵬灣路面塌空 大卡車牢輪袂振動

已經第三工矣，屏東台17線林邊這段路面猶是積水，大部份的車已經斡對別條路去，猶是有民眾硬欲騎車過，兩爿徛家水上深的所在差不多到跤頭趺，愛撩水才會當出門。
有民眾表示，「嘛是撩水矣，若漲潮閣落雨，攏會水排袂離，遮閣算林邊上低的所在。」

也有民眾講，「通常落較大，阮著自動閃開，所以愛上班真無方便著。」

附近民眾對淹水已經慣勢，毋過大鵬灣遮的路面因為大雨，雄雄塌一个空，這台聯結車倒爿四个後輪攏卡牢咧，駕駛掣一趒，趕緊敲電話叫吊車來處理。

山區瑪家鄉初二規工雨水量將近三百公釐，全國第二濟，真濟山路出現石頭落落來抑是塌去，佳哉已經撤離20人，警方嘛搝封鎖線，這馬禁止人車上山。

管制人員講，「必須愛封山封路，因為頂面有土石流、落石。」

這幾工海邊風湧嘛真大，就親像風颱天，東琉線按初二中晝以後到初三規工攏停開，愛等天氣轉好才會開放。