王信福判死刑滿十冬 廢死聯盟成立救援隊

廢除死刑推動聯盟,今仔日召開線頂記者會,宣佈成立救援大隊,來搶救佇看守所已經關5千外工的死刑犯-王信福。

冤獄案件平反者徐自強演王信福,這支紀錄片是進前廢死聯盟,欲介紹王信福這件冤案所翕的,27是王信福予法院判死刑確定的第十冬,幾若个團體做伙宣布救援王信福大隊正式成立。

廢死聯盟理事長張娟芬表示:「王信福案無科學證據,只有真兇欲拖伊落水的指控,這參蘇建和徐自強、謝志宏案攏仝款的手法。」

王信福被控佇1990年嘉義這間卡拉OK,使唆小弟殺人。毋過廢死聯盟認為,兇手陳榮傑開搶拍死兩个警察,因為伊的口供,法院就認定王信福是主謀,毋過這馬兇手已經槍決,閣無科學證據,疑點真濟。救援律師團表示,已經送爭議性死刑確定案件審查意見書予最高檢察署。

台灣刑事辯護律師協會理事長林俊宏:「阮希望共這寡落漆的所在,予最高檢察署知影,阮也希望紲落來規个司法系統會當替王信福開門,予王信福有機會通轉去厝裡。」

律師團希望檢察總長通確認案件的爭議,提出非常上訴,閣予法院通重啟調查,予王信福有公平的審判。

全台敬老金大調查

相關新聞