踮厝上班敢通歇風颱假? 勞動部:著照常作穡

烟花風颱結構繼續增強、向台灣倚近，氣象局預估，上緊拜三就會發布海上警報，無排除直接掃入來台灣。不過疫情三級警戒猶未解除，若歇風颱假，踮厝上班的民眾，敢也適用、免上班，引起討論。

民眾:「如果踮厝上班，你就免通勤矣，若免通勤，你就無一定愛放假矣。」也有民眾看法無仝，「這愛看公司的需求，若伊是風颱假，看是毋是加班費就愛予人。」

民眾看法無仝，不過勞動部表示若勞資雙方已經約定踮厝上班，勞工袂因為風颱無法度出勤，就算地方政府宣佈停班，勞工嘛袂當用風颱天停班做理由拒絕上班，若無雇主會當記曠職。勞動部勞動條件佮就業平等司司長黃維琛說明，「彼毋是講放假的概念，彼是因為安全性的問題，佇厝裡上班的，基本上咱就無需要出去上班，今仔日拄著風颱來，講實在的無礙著，基本上嘛是照常愛上班。」

抑若這陣中央擴大開放65歲以上的人注疫苗，有民眾煩惱請疫苗注射假可能會影響退休金，勞動部表示，請疫苗注射假的期間，工資和天數攏會先扣除，袂參總工資的天數落去平均，請民眾放心。