花博注射站按1日注1.4萬人 排隊規劃引不滿

臺北市花博館的疫苗注射站,今仔日開始共民眾注預防射,按算一工上濟會當注1萬4千人。毋過現場有民眾反映,等待區的人傷濟,社交距離僫維持,而且部份家屬等待區,真濟人是曝日頭徛咧等。

醫護人員的tshua7領民眾入座,準備注預防射,這是台北市聯合病院提供服務的花博接種站。花博接種站面積有2000坪,現場分做四區加上行動不便專區,計共18條接種線,每條線配1个醫生、2个護理師、4个行政人員,估計一點鐘會使服務1800个民眾,一工上濟會當服務1萬4千人。

毋過有民眾反映,等待區的人傷濟、社交距離可能無夠,而且佇外口的家屬休息區,逐家攏曝日頭、徛咧等,是較辛苦。

台北市副市長蔡炳坤講,「一開始啦,因為民眾攏希望會使較緊接種,所以拄開始通常佇上頭前一點鐘,確實人會較濟,阮真緊就共人佮人的距離冗開,阮有注意著,嘛馬上改善。」

臺北市立聯合醫院仁愛院區院長蕭勝煌說明,「當然就是佇出口的所在有家屬接送區,彼个家屬接送區,阮會閣做一寡改進予伊閣較好。」

台北市長柯文哲表示,花博接種站今仔日估計會有8918人來注,到下晡兩點,已經注超過5364人,這兩工共疫苗注了了後,應該會共花博接種站留落來。柯文哲講,「伊一工注兩个時段就會使注著14000,若是注三个時段,早時、下晡、暗時攏注,上濟會使注到20000人,所以佇未來,台北市若是真正欲注大量的疫苗,除了診所、病院以外,大概加一个花博就有夠矣。」

台北市強調,戶籍無佇台北的人,只要是蹛佇咧台北,包括外國人、街友、移工等等,攏會使來注,到14早時為止,台北市已經有百分之廿二以上的人已經注著疫苗,這是全台灣上懸的。

全台敬老金大調查

相關新聞