蔡總統授旗東奧選手團 戴資穎等4人代表出席
郭柏均 莊沛文 / 臺北報導
發布時間：
更新時間：
目次
東京奧運臺灣代表團的授旗典禮，佇今仔日舉行，因為三級警戒改做線頂辦理。這擺的奧運，已經因為疫情延後一冬，而且無開放觀眾。羽毛球國手-戴資穎佮體操國手-李智凱，嘛講著家己是按怎面對這擺，疫情當中的國際體育比賽。
團旗飄揚，祝福奧運代表團順利，今年因為疫情，奧運代表團的授旗典禮改做線頂辦理，濟濟選手佮教練透過視訊的方式，參加這擺的授旗典禮。
總統蔡英文講，「佇這段時間以來，一爿嚴格落實防疫，一爿照起工維持懸強度的訓練，阮佇奧運參賽的18个運動種類、66名選手當中，有夯重的世界紀錄保持人，有羽球的世界球后，有體操的鞍馬王子，有亞洲標槍第一人，嘛有台灣走了上緊的查埔人。」
這擺的奧運，因為疫情延延一冬，而且嘛無開放觀眾入場，按怎因應這擺無仝的奧運，是逐家真好奇的。羽球國手戴姿穎表示，「阮一月的時陣佇泰國比賽就已經是無開放觀眾，所以有彼擺比賽的適應，阮感覺會當真快適應無觀眾歡呼的比賽。」
體操國手李智凱講，「行李重點是囥佇防疫物資，畢竟這擺充滿無確定，無確定的因素較濟，所以會使對家己有閣較濟的保護，其實是較重要的。」李智凱表示，這擺奧運進前，因為疫情減袂少比賽的經驗，所以佇訓練的時，有模擬真濟比賽時，可能拄著的狀況，用無仝的方式，來準備這擺的東京奧運。
