眾人相楗共農會買檨仔 枋山果農仝款無地銷

屏東枋山受著疫情影響,檨仔銷袂出去,後來眾人鬥相共,共農會買檨仔,甚至有人認為檨仔攏賣了了阿。其實,有一寡規模較細的果子農,生理猶是真慘,因為袂曉行銷、無用網路,這改的銷量真悽慘

規山坪果子樹的檨仔已經大粒,果子農煞袂赴挽,這位蹛枋山的賴姓果子農,因為一家伙仔五个人有三个人佇隔離,賰伊顧上細漢查某囝,遮一甲外的果子園只好全交予伊一个人採收。

枋山芒果農賴璟蔚講,「家己一个人挽,倩工人無好倩 in毋敢來,有好朋友鬥相共。」

毋但倩無工,這馬嘛無人敢來收檨仔,枋山有困難的果子農毋但伊,真濟小農厝內佮倉庫,嘛滿滿攏是檨仔猶未出貨。進前各界絞幫買枋山檨仔,農會訂單全滿矣,逐家叫是枋山檨仔攏賣了矣,其實有小農估算一直到七月底,in閣有三千外箱的檨仔無人買。

枋山芒果農林町霙講,「枋山、春日、獅子鄉,這馬有真濟果子農的檨仔,攏是大出時期,閣咧採收。」

慈惠醫專學生事務處主任陳清雨講,「發現囡仔真濟厝內是果子農,攏是小農,厝內受疫情影響,經濟上真大的打擊。」

因為真濟果子農無通路,屏東慈惠醫專的老師做一氣買50箱檨仔,學校嘛呼籲校友佮各界,做伙來支持袂曉行銷的小農佮老農,嘛支持屏東檨仔。

相關新聞

專題|全台敬老金大調查