這陣開始，民眾會當佇超商等等的所在買著快篩試劑，大部分民眾、是按照說明書的說命，家己完成篩檢。毋過篩檢了後若是陽性，愛共棉仔枝包佇塑膠橐仔內底，做伙紮去採檢站。
這陣開始居家快篩試劑佇超商、藥妝店等等通路買會著。雖然講照說明書的指引，民眾應該會使完成自我篩檢，毋過篩檢了後，醫療器材欲按怎處理？
民眾:「應該就佮喙罨仝款，包予好，包起來。」
民眾:「陰性應該就直接擲掉，陽性的話，揣物件包起來 收起來。」
中央流行疫情指揮中心講，快篩的結果若是陰性，確實會使佇包好勢了後，直接擲掉，若是快篩結果是陽性，著愛有其他的處理方法。
疫情指揮中心發言人莊人祥:「若是你是居家隔離，抑是居家檢疫的人，愛馬上共當地的衛生局通知，抑是敲1922按照指示來處理，採檢的器材用塑膠橐仔密封包予好勢，提去社區採檢院所交予院所人員，若毋是居家隔離、居家檢疫的人，趕緊到附近的社區採檢院所進一步檢驗。」
指揮中心補充，就算快篩的結果是陰性，民眾嘛應該做自我健康的監測。另外民眾若是無確定買著的試劑，是毋是有經過核准，愛先確認包裝敢有防疫專案核准字號，嘛會使到食藥署的網站來查。