長期提供越南籍移工幫助的阮文雄神父講，這站仔有一寡移工因為工課到期、抑是勞資糾紛，欲轉換雇主，煞因為疫情，雇主無願意面試，揣無工課。阮文雄講，移工若是因為勞資糾紛換雇主，工課猶袂滿一冬，會使有兩擺兩個月的期限轉換雇主，其他的，是只有一擺兩個月的時間。
天主教新竹教區越南移工移民辦公室神父阮文雄:「兩個月in一直去，經過中人公司揣工課，但是因為疫情，In面試的機會真少，因為雇主真驚疫情，所以in一直減少面試機會。」
阮文雄講，伊這嘛幫助的移工有20幾个，其中至少有5个拄著這款狀況，希望勞動部會使延長轉換雇主的時間。台灣國際勞工協會TIWA嘛講，有聽著一寡移工有咧討論這个狀況。毋過勞動部是講，目前無接著這款消息。
勞動力發展署 跨國勞動力管理組副組長蘇裕國:「因為這馬疫情的關係，阮有一寡申請攏有自動延長，若是講欲延長第三擺，抑是講以後欲閣延長，這个部份阮未來應該是會使來研議看覓。」
