臺灣這馬毋但欠水嘛欠血，因為疫情警戒提升、民眾減少出門，無人去捐血。這馬全臺灣的血庫無到七工的安全庫量，是二十冬來上嚴重的一改；高雄捐血中心表示，捐血是醫療行為，護理人員攏會做好防疫措施。
捐血中心等規晡，冰箱才三袋血，來到冰庫，遮爾濟架仔嘛攏空空的，台灣疫情升級了後，欠血情況真嚴重，各地捐血人數一直落，加上活動攏取消，全台血液存量上低的時干焦賰4.4工，高雄閣愈嚴重，賰無四工。
高雄捐血中心企劃課長楊贛屏:「公司學校部隊，因為對群聚活動有疑慮，取消足濟團體捐血活動，頂禮拜六的時陣，高雄中心無夠四工庫存，這算是二十冬來較嚴重欠血的情形。」
高雄捐血中心遮，平常時一工會當抽五、六十袋的血，這馬一工抽無三十袋，差不多落一半，毋但民眾減少出門，捐血車嘛無出動，捐血中心按算，一直到五月底，至少會閣減八千袋。知影全台攏欠血的消息，抑是有人來捐血。
民眾李先生:「我原本定期有捐血，嘛是趁這个時間點來，較少人，這馬顛倒比較安全。」
民眾黃小姐:「我平常就有捐血，拄好算過會當捐，看著大欠血，所以才來捐。」