婦團籲育嬰留職停薪制度改革 望津貼增加

母親節得欲到矣,婦女團體今仔日開記者會,講這馬的顧囝留職停薪津貼,會使領著的錢傷少,而且申請的制度嘛無法度應付臨時的狀況,呼籲政府愛來改革,莫予晟養囡仔變做一件需要犧牲的代誌。

母親節進前,婦女權益佮相關團體召開記者會指出,這馬請育嬰假的留職停薪津貼制度真需要改革,目前的津貼是以勞保投保薪資的六成落去算,毋過工會團體指出,投保的上限干焦45800,而且有真濟公司會短報薪資,實際領到的數字,敢若是咧處罰請育嬰假的人。☒希望標準著提懸,會當領實際薪資的九成。
 
台北市產業總工會副理事長王燕杰:「會造成你實際佇育嬰期間,領著的薪資恐驚會無原本的四成,這啥物意思,就是你著愛佇家庭經濟,佮晟養囡仔內底選一个。」
 
彭婉如基金會副執行長林綠紅:「按呢的狀況之下,家長的理性選擇,當然是薪水低的人去請,但是薪水低的,佇台灣現行的狀況就是女性。」

婦權團體指出,男女之間的薪資有落差、本來就是一个問題,毋過現行的政策是共這个問題閣再擴大。除了津貼的問題,欲申請津貼的制度嘛是一个問題。
 
彭婉如基金會副執行長林綠紅:「目前的育嬰留職停薪津貼,伊有幾項大問題,第一个大問題是伊一擺請需要是六個月。第一个挑戰是我愛撙節,我離開六個月了後轉來工課場,我敢會佇職務上受著較䆀的評價。」

開記者會的團體呼籲,會使改以一工做單位,來申請育嬰留職停薪的津貼。按呢家長嘛較有法度應付親像過去因為腸病毒臨時停課,等等的突發狀況。調整津貼需要的錢,建議由國家來負擔,會使考慮用就業安定基金來支付,解決財源的問題。

全台敬老金大調查

相關新聞