成立5冬外 母語協會拍拚促進臺語生活化

受著大環境影響，袂少囡仔佇學校以外，誠罕得有機會講母語，這馬有母語團體已經經營5、6年，辦的活動也超過160場。這馬也向社會局立案會成做協會，望母語會當佇日常生活當中，變做真四常的語言。

馬場頭家用台語紹介農場的這陣小主人，嘛予囡仔兄囡仔姐試摸鵝仔的腹肚。

雞、鴨、鵝攏看過了後，小朋友提食物去揣農場的主角，Footprint 和Bella兩隻馬。囡仔嘛綴教練，學上馬和落馬的撇步，閣來出發騎馬囉。

阿璇媽媽講因為認同台語生活化的理念，已經tshuā阿璇參加母語團體三四冬矣，主辦這个活動的母語團體也坦白講，像阿璇按呢對母語有智覺的家庭雖罔沓沓仔增加，不過母語團欲永續經營，猶有一段路愛行。

人講花開毋知芳，結子才驚人，潤庭講in對五六年前成立這个母語團體到今，辦超過160場活動，不過未來辦活動的開銷，猶不時愛向政府部門請補助，in也寄望母語路會當有閣較濟人關心幫贊，才通予母語結子開花，媠閣久長。