取消儀隊向蔣銅像致意 促轉會:會揣國防部協調

佇二二八假期進前,促轉會特別說明一寡任務執行,包括蔣家的銅像、中正紀念堂等等威權象徵解除的成果。促轉會表示,會先參國防部、文化部來討論,取消儀隊向蔣介石銅像致敬的儀式。

228假期進前,促進轉型正義委員會說明這幾冬來推動轉型正義任務的重點成果。其中中正紀念堂、兩蔣銅像等等威權象徵欲按怎共解構,一直受著社會的關注佮爭論。最近促轉會嘛提出,欲取消儀隊佇中正紀念堂大廳向蔣介石銅像致敬的儀式。

國防部回應,相關議題會閣來研議。促轉會是表示,對取消儀隊致敬的部分,過去也捌參相關單位討論欲撤離抑是改佇咧戶外表演,未來會繼續協調。另外,促轉會也講會先佮文化部合作,針對紀念堂內底的文宣、說明牌仔、導覽等等,推捒多元歷史觀點,解構威權象徵。

親像導覽員愛用無仝角度來導覽,文化部表示未來細節會閣參促轉會討論規劃。根據促轉會統計,扣除慈湖的兩蔣銅像,除了國防部、退輔會因為歷史因素,欲共銅像徙走有較困難,全國計共一千五百外座,到今已經搬徙超過三百座、將近四分之一。另外針對促轉會當前的任務按佇五月滿限,葉虹靈表示,轉型正義的工課毋是短時間內會當完成,會繼續向中央爭取延長運作時間。

 

相關新聞

專題|全台敬老金大調查