清大研發篩檢試片 敢有抗體15分鐘就知

全世界攏咧搶武漢肺炎疫苗，毋過就算有疫苗，也無法度保證、一定會產生防護力。清大醫工所的團隊、這馬有研發出、一種快篩試片，只要滴一滴血，15分鐘就通好知影，注射過疫苗的人，敢有產生保護力。

共試劑滴咧試片頂懸，免偌久的時間，試片頂懸就會共你講，你的身上敢有新冠肺炎的抗體，參一般民眾佇厝內測量血糖仝款方便。

台灣對外採購疫苗傳出好消息了後，清大研究團隊嘛隨針對注射疫苗了後，是毋是產生保護力，研發出這款快速檢測的試片，佮目前傳統的方法比較，毋但速度較緊，費用嘛閣較俗。

為欲予檢驗結果更加準確，閣會使配搭這台會使隨時紮佇身軀邊的機器，共試片插入去，經過分析就會使知影，疫苗對人體的保護力發揮到啥物程度。目前這套試片已經佮病院以及廠商合作，希望會當加速新冠肺炎疫苗的研發。