有醫護指接受採檢.病院煞扣薪水 臺大病院否認

真濟病院為著欲防止疫情，攏會加強對醫護人員採檢。毋過煞有醫護人員出面陳情，講因為有出現症狀著愛採檢，採檢了後，病院要求轉去厝裡歇睏，這段時間著愛請病假；這毋但會影響薪水，也會影響個人表現。臺大病院也掰會講，這是絕對無的代誌。

受著桃園部立病院疫情的影響，真濟病院擴大對醫護同仁的篩檢。毋過有台大醫護人員反映，in配合採檢、病院煞另有規定請病假，就愛扣績效點數。

照這位護理人員的講法，扣去的績效點數，等於是一工予人扣五百箍，in感覺予病院剝削，台北醫師職業工會表示，按in了解，閣有病院是請病假扣半薪，實在無啥合理。

針對醫護反映自動接受採檢，煞予扣獎金、薪水的代誌，台大病院也佇面冊發表聲明，澄清是予同仁改用tuà厝辦公，袂扣薪水、績效等等，毋過下跤就有人質疑，護理師欲按怎踮厝辦公？中央流行疫情指揮官陳時中，也對這層代誌發言，認為若扣薪水就無適當，會對相關問題閣做討論。