捌成做市中心 臺南民權路五條港區往過真交易

古早咧講：「一府、二鹿、三艋舺」，形容臺南府城，是臺灣上繁華的所在。現時臺南中西區的民權路，正正是五條港貿易的、主要路線，也是南北二路、行郊往來要地，見證當地的鬧熱發展。

來來去去的車陣，踅台南市中西區的圓箍仔走，這个所在因為是市區地勢上懸的所在，離安平港差不多懸14公尺左右，所以佇日本時代，就被政府揀做市政中心，包括台南州廳、氣象台、警察局攏起這箍輾轉。

對圓箍仔湠出去，民權路頂就通看著當地地勢上懸的信仰中心─北極殿。

順安平港的地理位置，對民權路中段閣再往西爿去，就會來到乾隆到道光年間，當地上鬧熱的宮廟─水仙宮，宮的廟埕毋但是當地上大的菜市仔，也是所有郊商交貨的集散地。

往過台南市五个河港由北到南，有新港墘港、佛頭港、南勢港、南河港、安海港，其中南勢港也就是現在的民權路，是經濟發展上主要的線路。

三百外冬前的台南市，每一角勢，攏有一个文化園區，分散佇五條港的發展範圍，雖罔時移境遷，五條港這馬攏平面化矣，不過這條台灣上早開始發展經濟的民權路，伊的風華和重要性，猶深深存在。