專家研發狐狸尾蘭 芳味雅氣.色水迷人

南投草屯有一个狐狸尾蘭的專家魏榮泰，伊開30冬的時間，共泰國的原生種蘭花，改良成做熊貓、綠精靈等等超過13種色水模樣攏無相像的蘭花。毋但花形媠，閣有淡薄仔芳味。咱做伙來欣賞。

紅色、白色、茄仔色，濟濟的蘭花、規捧規捧的開甲有夠媠，而且閣有淡薄仔芳味，非常迷人。吸引外地遊客特別對遠路來到台中草屯參觀。

遮的蘭花號做狐狸尾蘭，花形顧了特別大範，色水、花草嘛真濟款，親像熊貓等等超過13種的蘭花，攏是魏榮泰30冬以來所研究、改良出來的品種。

一欉蘭花對栽仔培養到開出遮爾媠的花蕊，愛兩冬的時間。魏榮泰講，原生種雖然是對泰國來，遮的蘭花已經適應臺灣的氣候，只要水分、養分顧有齊勻，就會逐冬攏開甲遮爾媠。

記者 綜合報導