大鵬灣迒海大橋 三月起黃昏五點才"開橋"

天氣變熱，日頭較晏落山。大鵬灣風景管理處今嘛宣布按三月開始，過海大橋開橋的時間，對下晡四點半改做五點。另外，嘛增加暗時燈光變化演出的時間，尤其暗時這款「光雕表演」，對拜一到禮拜，逐日攏有設計無仝的色緻。種種的用心，就是欲予遊客來遮行踏，不時攏有真正奇巧的體會。

屏東大鵬灣這座迒海大橋對中央開開，濟濟遊客圍佇邊仔欣賞。這是規臺灣唯一一座會使拍開的橋。自底是設計予大型的遊艇出入大鵬灣的時使用，這馬嘛成做是觀光的景點，三月開始，歇睏日的欲暗仔五點開橋。

欣賞大鵬灣的風景有濟濟的方式，下晡會使騎跤踏車踅大鵬灣一輪16公里。黃昏時看開橋，暗時閣有光雕照大橋。光雕對拜一到禮拜，逐日攏有無仝的光焱、色水變化。

大鵬灣有海岸的自然景致，嘛有別位看無的開橋景觀，日時、暗暝予遊客無仝的體驗。

記者 綜合報導