臺南今年頭例本土天狗熱 移工帶病入境傳染
加入公視會員，
按讚收藏你關注的報導
發布時間：
更新時間：
臺南今年頭一擺出現本土天狗熱病例，閣一睏仔增加2个，源頭是來自一个帶病入境的案例；這3个人攏是仝一間工廠的員工，研判是群聚感染。衛生局趕緊去消毒，呼籲鄉親著注意環境衛生。（新聞標題、導言及內文皆為台語文）
透早環保人員針對戶外水溝仔全面加強噴藥仔，確保逐个所在攏愛噴甲到，欲防止天狗熱疫情湠開。根據疾管署10/20公佈，臺南增加2个本土個案，攏是20外歲的少年仔，攏佇南區仝一間工廠做工，研判是工課場所群聚感染。這陣患者攏咧病院治療，病情穩定，毋過這嘛顯示出有本土傳播的風險。
臺南市衛生局副局長 林碧芬：「兩个天狗熱本土病例是南區工廠群聚，佇遮欲呼籲咱的雇主佮仲介業者，若移工若像有出現是天狗熱的症頭，請馬上通報衛生局，若無通報會依傳染病防治法，罰三千箍以上一萬五千箍以下罰金。」
這是臺南今年頭一擺出現本土天狗熱確診，閣一擺出現兩个。衛生局調查發現，感染源若像是仝一个工廠，來自菲律賓、9月底入境的外籍移工，衛生局已經針對工廠、宿舍佮徛家，攏完成環境清毒，嘛擴大採檢174个接觸者。這陣當地社區嘛提高警覺出動人員，逐工清理。
社區防疫組長 王先生：「每一期（天狗熱）的症頭攏無仝款，毋過若交叉感染就會變做重症。」
在地里長：「這佇工廠內底發生的，但是戶籍就佇阮這里，阮嘛是愛擔起這个責任來做。拜一開始阮有一个區籍會議，阮遮的里長有一个共識：阮欲連續一個月的時間，全部來做清理的工課。」
往過天狗熱攏佇熱人，極加10月就會較轉和，市府呼籲逐家，雖然天氣沓沓轉涼，毋過猶是愛定期摒掃環境，才通防止疫情擴大。
記者 李晨宇 臺南採訪報導
唐嘉良/編輯
