保護消防安全 環境部引進頭一隻救災機器狗

機器狗接著命令，反應真緊，隨peh樓梯到二樓災區，這是環境部為著欲提升救災安全，開千外萬對美國買來的頭一隻機器狗，欲運用科技來協助救災。

環境部南區環境事故技術小組 高廷嘉：「現場是啥物物件漏洩，抑是啥物物件發生災害，咱應變同事，消防、環保、技術小組，穿閣厚閣重的裝備，然後佇高風險的情形下，入去危險區共遮的數字紮出來。」

環境部表示，面對國內的毒氣化學災難，捎無摠是上大的敵人，有的需要降溫，有的袂使用水，處理的方式若毋著，災情就會進一步擴大。所以環境部才會引進救災機器狗，伊會當代替人入去高風險所在測溫度佮空氣等等，閣配合無人機和機器人鬥陣救災。未來希望北部、中部、南部攏會當至少有一隻。

環境部政務次長 謝燕儒：「尤其這機器狗，伊會當長時間佇遐，做偵檢、傳輸數據，予阮做上好的救災行動。這期的計畫是民國114年至118年，阮希望這期內底，（小組）會當予伊（機器狗）攏有，先對一隻到三隻，到未來可能十隻。」

環境部強調，未來也會引進閣較濟的智慧科技，臺灣也會發展家己的救災機器狗，目標是打造臺灣成為東亞地區毒災應變和技術訓練的重要所在。

記者 陳心彤 謝季潾 臺北報導