南部貓狗收容園區淹水 網路若像有募款詐騙

飼料平台業者的面冊頂懸，一篇一篇的文，寫的攏是這擺南部地區有貓狗收容園區受災，向望逐家鬥相共來買飼料，袂少民眾攏有捐錢，毋過這幾工台灣動物緊急救援小組紲紲仔接著民眾檢舉，講這間飼料平台是用怹的影片去刊廣告，愛逐家捐錢送飼料，救援小組一查才知影，這間公司是私人的，毋是公益團體，初步估計有上萬人捐錢。

台灣動物緊急救援小組發言人 倪京台：「因為網友看著遮貓狗園區足慘的狀況，怹就當做講這是一个公益團體，所以就去捐錢；毋過其實怹毋知影講，這其實是一間100%以營利為目的佇賣飼料的公司。」

因為廣告影片剪接的訪問，有的毋是受災園區，所寫的文字馬會予民眾誤解，家己捐的錢是欲幫助災區，因此袂少民眾攏感覺家己予騙去，要求業者愛講清楚，業者也貼出聲明，毋過煞只有針對無授權使用公益影片的部份來道歉，捐款運用的部份攏無說明，這个平台有公佈誠濟受幫助的收容園區，記者也實際敲電話去了解，敢有收著業者送來愛心飼料。


趙媽媽狗園負責人：「怹有做甲到，我毋知影這中間送佮募是啥物款的一个情形，我毋知影；毋過伊是真正有送（飼料）來阮的園區。」

雖罔求證的這間園區無受災，毋過確實有收著愛心飼料，不而過業者的作法確實會引起誤會，咱實際求證業者，怹無欲接受訪問，只有講會將捐贈的資料整理好勢，到時公佈佇網站。台南市府表示，民間單位若無提著合法許可、無公文依據，袂當做任何方式的勸募行為，如果有民眾檢舉，市府會進一步調查。

記者 許嘉茹 邱紹揚 高雄報導