宜蘭賣場設「開講結數櫃台」 講台語關懷長輩

「來買物件感覺按怎？敢有歡喜無？」
「開錢無歡喜。」
「真的喔， 開錢無歡喜，按呢較捷來的啊。」
「開錢無歡喜，妳閣叫我較捷來。」

那和阿伯開講，那講耍笑，這是宜蘭連鎖大賣場，新設的開講結數櫃台。

「這阮家己做的麵包，麵包科家己做的點心。」
「你足親切的。」

結完數閣貼心提牛奶、麵包，予阿伯阿姆，序大是攏笑咍咍，一直呵咾足貼心。

消費者：「較濟所在有（結數櫃台）較好。真好啊，因為阮佮意開講。」

消費者：「（第一改拄著這種服務？）第一改、第一改，真好、真好。」

賣場收銀課經理 藍偉芸：「若是針對透早來的人客，阿公、阿媽就是可能血糖較低，阮會問講伊敢有食早頓，然後就可能提供一寡麵包、糖仔、牛奶佮豆奶抑是水。」

賣場講當初會想欲設「開講結數櫃台」，是因為看著荷蘭有超市，流行這款服務，後來才會共引入來宜蘭試辦，希望予結數變做佮老大人溫暖的對話，沓沓仔結數免驚後壁有人催，打造一个友善的賣場環境。

消費者：「店員有佮一寡較老的老大人，有拍一下仔招呼，我是感覺講這是一个真好、真好的一个方案。」

連鎖賣場公共事務部部長 陳依芳：「這馬宜蘭店是阮這个系統內底，阮第一間店按呢做；若講伊的示範效果袂bái，當然阮其他的店，嘛會當來遮採取仝款的模式。」

賣場講佇開講櫃台服務的員工，攏是特別揀過的。毋但需要有社會經驗、上好是閣愛會曉講台語，愛佮老大人開講話仙。賣場閣提供65歲以上的序大免費的配送服務，毋免捾甲大包小包，予序大真肯定。

記者 鄭亞宣 莊浚佑 宜蘭報導