高雄老師要求國小生背刑求方式 教法引爭議

高雄市一位家長向議員陳情，內容寫著，伊的囡仔今年國小五年仔，老師竟然將白色恐怖受害者夆刑求的方式當做教材，比如用薰燙面、予拍甲吐血等等的暴力對待，要求囡仔愛背起來、閣愛考試，按呢的教材敢有妥當，袂少家長聽著，也攏無認同。

家長：「彼嘛算是一種暴力，其實無必要閣共這寡仔加害的代誌，閣提去予後一代。」

家長：「規个刑求的行為有用啥物方式，我感覺這無需要講甲傷過詳細；猶毋過我感覺有必要，針對怹佇彼段期間，有受著無好的對待。」

市議員也共這份社會課教材，提來議會質詢，伊認為按呢的內容對國小五年仔的囡仔來講傷過暴力，遮爾詳細的刑求方式，嘛已經違反兒童權利公約佮教育基本法，要求教育局愛好好調查了解。

高雄市議員 許采蓁：「我相信局長你嘛會當認同，這个無應該出現佇小學生的教材內面；這陣的課本嘛干焦寫講非人道的對待。」

高雄市教育局長 吳立森：「佇咧反映歷史事實的情形下，嘛愛去考量學生囡仔的年歲、認知，抑是心智成熟的程度，去做教材的選擇佮編寫。這部份阮會連鞭去了解這个事件。」

投訴的家長希望教育局做好監督，佇囡仔心智攏猶袂發展完全的階段，應該用適當的內容佮方式去牽教，教育局表示，經過了解這是老師個人的行為，後續怹會密切注意老師的教學方式，落實教育中立佮專業要求，予學生安心學習的環境。

記者 許嘉茹 邱紹揚 高雄報導