行政院會：新傳預算予人刣掉 倩袂起手語老師
發布時間：
更新時間：
行政院今仔日（23）佇記者會，共聽障朋友會失禮，原因是行政院的新聞傳播費用，予立法院全部刣掉，所以無預算閣倩手語老師。有聽障團體就表示，希望朝野黨派莫閣冤落去，毋通犧牲聽障朋友的權益，趕緊辦恢復手語翻譯，予怹通佇第一時間內了解政策和公共資訊。（新聞標題、導言及內文皆為臺語文）
拜四（23）行政院開記者會，毋過，詳細看正爿下面的位置，寫講「新聞傳播處費用，因為予在野黨刪除，無法度倩手語老師」。原底這个烏框的位置，咧往過行政院記者會的畫面，是有手語老師咧比手語的，毋過這馬煞看袂著囉。
行政院發言人 李慧芝：「阮平常佇院會後記者會，咧綠幕投前攏會有手語老師；毋過因為新傳處預算予人全部刣掉，所以阮真正倩袂起手語老師矣，對聽障朋友真正足歹勢。」
行政院表示，原本新聞傳播處的預算咧114年度有編0.5億，毋過，這改予立法院全部刣掉，致使無錢通倩手語翻譯。有民間的手語團體表示，這改立法院三讀通過所刣掉的預算，已經嚴重影響著，聽障朋友的權益，無法度佇第一時間內了解政策、和公共資訊。
基隆市聾啞福利協進會理事長 黃勝明 vs 秘書 陳麗琴：「立法院按呢冤家真正無必要。伊希望講好好講一下，行政院行政首長希望沓沓仔，逐家冷靜斟酌想看覓按怎幫助聽障朋友。」
另外，台灣聾人聯盟嘛出面聲援，咧面冊貼出聲明，希望朝野立委保持包容、公平的態度，保障聽障朋友的資訊平權。抑若，國民黨嘛佇面冊回應講，建議行政院會當向臺北市社會局，申請免費的手語翻譯服務，確保聽障朋友的權益。
記者 鄭亞宣 許猛捷 臺北報導
唐嘉良/編輯
