移工團體提出訴求 促重視職災保障、專案勞檢
發布時間：
更新時間：
咱臺灣的製造業，目前差不多倩47萬个移工，因為穡頭較粗重、較危險，對身體的負擔佮傷害攏誠大。這陣有移工團體去勞動部陳情，希望加強勞動檢查、調整職業災害的認定標準，保障移工的權利。（這條新聞標題、前言、內文是台語文。）
移工團體聚集佇勞動部門口，遮的移工大部分攏是佇製造業上班，拄著職業災害的時雇主煞無欲插。親像印尼籍移工Anas就講，伊因為長期搬傷重的物件致使龍骨就愛手術，毋過雇主煞認為這毋是工課造成的。
印尼勞工，Anas表示：「病院講這愛開刀，開刀好矣，我共頭家講『頭家共我鬥相共一下，醫生講我愛開刀，我無錢。』伊講『這你毋是上班(造成的)，這是你家己的問題。』」
台灣國際勞工協會表示，長時間作業造成慢性的職業病，長期累積對移工的健康安全造成真大的威脅。協會也講移工每三年就愛轉換工廠，這也致使移工的工課欠連續性，無好申請職業傷害。IN欲呼籲政府愛共中小企業的勞動檢查專案化，也愛加入移工的角度，予移工有健康安全的工作環境、降低職業傷害。
台灣國際勞工協會專員，張郁表示：「移工𪜶明明佇工廠內發現問題，但是𪜶也知影，逐改有政府的人來檢查的時陣，這寡雇主就會開始造假，共一寡機器的運轉設備，調到上懸工率；無就是準備一寡文件來應對遮的檢查。毋過實際上，佇工廠進行的代誌，完全是另外一回事。」
目前台灣的製造業大約有47萬的移工，大部分攏是做粗重、佇高風險的工作環境，出現職業災害煞無法度得著完整的保障。針對移工團體的訴求，勞動部職安署有回應表示，勞動部有針對倩移工的高風險佮高職災事業單位，實施外籍移工職業安全衛生專案檢查，抑若未來是毋是欲予移工參與勞檢過程抑是相關專門會議，職安署會閣再研議討論。
張佳倪 許猛㨗 / 臺北報導
陳怡臻/編輯
