人權博物館辦烏名單展覽 籲民主自由著珍惜

過去台灣威權時期，濟濟人因為參與黨外運動、特定宗教團體、支持反對政府的活動，就去予政府列入「烏名單」，無法度出入境。國家人權博物館以烏名單的歷史為主題，規畫展覽，希望予民眾了解，台灣的自由民主有偌珍貴。

威權時期烏名單人士艾琳達：「為著美麗島運動，真濟人投入，海外的人大概500人投入，然後上烏名單，大部份攏上烏名單為著聲援美麗島，聲援這寡予人掠的人in就無法度奔喪，無法度轉去看爸母，這對真濟人是真大的心理傷害。」

美國籍的艾琳達女士，講起予國民政府禁止出入臺灣，心情是真無奈。伊佇1970年代佇咧臺灣做學術研究、嘛參加美麗島運動，為著救援海內外的政治犯，參濟濟國外的人權團體接接，尾手去予國民政府列入烏名單。彼當時有濟濟人佮艾琳達仝款，予政府列入烏名單，為著欲予少年輩民眾愈了解這段歷史，國家人權博物館特別舉辦戰後黑名單特展。

策展人薛化元表示，「咱一直到今仔日猶面對外在的威脅，我想這是一个真大的問題，咱必須愛深化歷史教訓，深化遮的價值，才會當保衛咱的故鄉臺灣。」

展覽會場利用實際體驗，民眾提護照去掃，出現紅色警報燈，就代表無法度出入境，予民眾感受自由受限制的感覺。文化部次長王時思講，雖然這馬台灣有亞洲上進步的民主自由，但是過去有真濟歷史猶未見光。

文化部政務次長王時思，「不管是228、不管是白色恐怖，確實的、具體到底有偌濟，犧牲偌濟人，到底偌濟人失去性命，偌濟人失去自由，偌濟人失去家園，這个數字到今仔日猶咧研究當中。」

文化部次長王時思講，臺灣佇威權時期，到底有偌濟受難者，目前猶無法度提出正確的數字，伊認為，這代表這馬台灣的民主自由猶未完全穩定，猶是咧風險當中，嘛代表台灣的民主自由，猶愛繼續拍拚。