相褒歌是早期居民共日常的感受，透過文字結合音韻唱出家己的生活，毋過，這馬澎湖南方四島會曉相褒歌的耆老已經賰2个，面對遮傳統文化的流失，內政部國家公園署海洋國家公園管理處，特別共這三位耆老的褒歌故事用紀錄片的方式保存落來。（此則新聞標題、導言、內文皆為臺語文。）
這馬澎湖南方四島會曉相褒歌的老輩真少，為著紀錄這項傳統文化，內政部國家公園署、海洋國家公園管理處，特別揣導演拍紀錄片，共褒歌的故事用影像保存落來。
「西坪的厝砌山頂，厝頂看海上蓋清。」
澎湖南方四島的耆老，用相褒歌的方式唱出佇西嶼坪的生活風景，閣有細漢的記持。這齣紀錄片《褒出海島人生：澎湖南方四島褒歌記憶》，是紀錄佇澎湖南方四島，會曉相褒歌的耆老，透過影像予民眾了解遮、面臨危機的相褒歌文化。
紀錄片導演鄧文斌講：「(南方四島)賰2个(耆老)，所以其實褒歌是足危險的，就是講文化這个物件，愛活的保存，若是人離開矣，遮的物件就消失矣。」
導演也表示講，因為南方四島人口外流的情形真嚴重，加上交通無蓋方便，這个相褒歌文化欲傳承甚至保存攏真困難。內政部國家公園署海洋國家公園管理處毋才會委託伊做紀錄片。長年研究褒歌文化的洪敏聰老師，這改也用澎湖腔的臺語替這齣記錄片配音。
褒歌老師洪敏聰講：「伊是自然產生，這个人若是無佇咧，你就自然消失去。」
洪敏聰老師表示，這馬澎湖本島會曉相褒歌的人恐驚無超過10个人，面對文化傳承的斷層，海管處也表示，紀錄片27佇澎湖頭改搬演，未來會規劃去到澎湖抑是台灣本島各學校，tshuā褒歌的耆老佮遮少年朋友分享，希望有閣較濟人同齊來認捌這項特別的傳統文化。