中秋節也是月老生 濟信眾拜拜祝壽領姻緣餅

舊曆八月十五中秋，是一家伙團圓的節日仔，嘛是月老聖誕的日子，17有濟濟欲求好姻緣的民眾，來到臺北霞海城隍廟參加月老祝壽的儀式，食喜糖、領姻緣餅。

民眾講：「線頂抽籤詩的網站，然後伊就有寄批予我，講今仔日有這个活動，希望會當揣著好姻緣按呢。」

民眾講：「阿母共阮講中秋節是月老的生日，然後無一个有男朋友抑是女朋友，所以就叫阮來拜。」

提著姻緣餅的民眾攏真歡喜，日頭誠炎，猶是有各地的民眾專工來拜拜、求紅線抑是還願。另外，中秋這工，閣有日本沖繩來的獅陣佮太鼓隊，來到霞海城隍廟獻藝、祝壽。

獅仔佇廟埕輾來輾去，不止仔活潑，現場民眾看甲真歡喜。臺北霞海城隍廟表示，閣過一兩個月，就欲共月老請到沖繩交流，所以沖繩的藝陣就趁月老聖誕這日來表演致敬。

臺北霞海城隍廟文宣組長吳孟寰：「除了疫情的時陣，咱每一年攏有去沖繩，去遐毋但神明去，閣有in講台語、做臺灣菜，抑是講做一寡臺灣的DIY，就是講咱家己的故事，講咱家己的文化，月老毋但牽姻緣，嘛是牽咱兩个所在的文化，共牽起來按呢。」

廟方表示月老是管各種緣份的神明，希望透過祝壽儀式、分姻緣餅，予民眾無論是姻緣、人緣攏順順利利，嘛向望臺灣透過民俗文化的交流，通和世界結好緣。