8/4鬼門開 臺南赤崁炤民眾體驗做普渡公燈

用紅色的色料佇布面頂，一筆一劃寫吉祥的話語，兼畫圖做妝娗，尾手才鬥篙錢參笠仔就成做普渡公燈矣。舊曆七月民間信仰相信好兄弟會予人放出來，往過常在佇廟口攏通看人掛這款燈，毋過這陣時代改變，普渡公燈已經真罕看。臺南赤嵌社區發展協會煩惱傳統技藝會失去，頭擺辦工作坊予人來體驗，𪜶向望共這項百冬歷史的文化閣撿倒轉來。

參與民眾講：「特別是揣專冊予囡仔去看，然後家己才閣去練習按呢畫；另外佇這个歇熱學著有無仝的文化體驗。」

赤嵌社區發展協會理事長張耕華講：「少年輩攏較無接觸著這種文化，毋過我佇金門有看過這種普渡公燈，嘛希望咱臺南會使有這種課程。」

根據了解，普渡公燈上起頭內底面是點油燈佮蠟燭，後來時代演變才改做電火球仔來炤光。這个文化，伊的意思就是予好兄弟仔佇凡間會當好行路，閣較重要是代表世間的人對𪜶的心意。

蓬萊齋工作室黃雉原講：「瓜笠仔、草笠仔這種會使小可仔遮雨，會當予內底燈莫按呢熄去。較早(內底)用的是蠟燭、蠟條，若是講風雨來就驚去予沃著，所以咱就囥這个瓜笠仔佇咧頂懸。」
文史工作者謝奇峰講：「是按怎欲用普渡公燈，（好兄弟)對陰間出來的時陣，佇暗夜有一葩燈就是有一个歇睏的所在，遮陽間已經到矣會當好好仔休息，這是非常人性化的設施。」

七月是慈悲的月份，文史工作者講，毋干焦有設普渡公燈的文化爾，其實有的廟宇嘛會共本成囥佇外口的五營做收營的動作，甚至有的嘛暫時先共烏旗請入去廟內，這攏是為著尊重好兄弟一冬一改轉來到陽間的傳統文化。